UiT er om bord når MarTrans kastar loss

– Me ser fram til å bidra. Mange av problemstillingane er relevante for UiT sin aktivitet inn mot maritime energisystem, seier førsteamanuensis Bjarte Hoff ved Institutt for elektroteknologi.

FME MarTrans er finansiert av Forskingsrådet og industripartnarar, har eit budsjett på over 300 millionar kroner og samlar 60 samarbeidspartnarar frå industri og forsking. Målet for senteret er berekraftig skipsfart og auka verdiskaping i norsk industri.

Hoff er UiT sin kontaktperson inn i MarTrans. Han ser fram til samarbeidet og understrekar at mange av problemstillingane i senteret er relevante for instituttets arbeid.

Vil bidra med spisskompetanse

UiT sin deltaking i MarTrans styrkjer ein allereie solid prosjektportefølje for Institutt for elektroteknologi innan elektrisk transport, som inkluderer forskingssenter som FME Hydrogeni, Horizon Europa-prosjektet HyEkoTank og Interreg Aurora-prosjekta SAMHand og DeHigh.

Bjarte_Hoff_UIT_19571_Foto_Espen_Dalmo (1).JPG — Førsteamanuensis Bjarte Hoff. Foto: Espen Dalmo

– Me ønskjer å kopla denne forskingsaktiviteten og kompetansen han gir med relevant regional industri. Samtidig utdannar me ingeniørane og sivilingeniørane for framtida med spisskompetanse innan eit viktig og spennande fagfelt, seier Hoff. Gjennom MarTrans vil han også vera medrettleiar for ein doktorgradsstipendiat ved NTNU.

Ein felles innsats for nullutslepp

FME MarTrans vart offisielt opna i Trondheim 6. februar, der konsernsjef i SINTEF, Alexandra Bech Gjørv, understreka betydninga av samarbeid i maritim sektor for å nå målet om nullutslepp innan 2050.

– Dette er ein draum som går i oppfylling. Å samla den maritime klyngja i jobben mot det felles målet vårt, det er stort, sa Gjørv.

Administrerande direktør i NHO, Ole Erik Almlid, framheva viktigheita av forsking og innovasjon for å styrkja norsk maritim konkurransekraft.

– I dette senteret ser me kombinasjonen av ei næring med behov for omstilling, kunnskap som bidreg til grøn omstilling og samtidig gir auka konkurransekraft for norsk maritim næring, sa Almlid.

Noregs nest største eksportnæring

Under opningsarrangementet vart ulike teknologiske løysingar diskuterte, inkludert batteriteknologi, ammoniakk, hydrogen, biodrivstoff, segl, luftsmørjing og AI-navigasjon.

Den norske maritime sektoren står for over 600 milliardar kroner i årleg omsetning og 300 milliardar kroner i eksportinntekter, noko som gjer han til Noregs nest største eksportnæring etter olje og gass. Samtidig står maritim transport for ni prosent av Noregs klimagassutslepp og 12 prosent av globale transportutslepp.

For å nå nullutsleppsmålet for sektoren har MarTrans identifisert fire hovudutfordringar som må løysast:

Redusera energiforbruket drastisk
Utvikle grøne og sikre energisystem om bord
Sikre påliteleg og kostnadseffektiv forsyning av grøne drivstoff
Sikra ein økonomisk og miljømessig berekraftig overgang

I tillegg til forskingsaktiviteten vil MarTrans utdanna rundt 100 kandidatar på master- og Phd-nivå, med tett kopling til industripartnarar for å sikra relevant kompetanse.

Kortnytt fra Fakultet for ingeniørvitenskap og teknologi

Eidum, Espen Viklem espen.eidum@uit.no Kommunikasjonsrådgiver