Vann beste forskarfoto i internasjonal fotokonkurranse

– Eg kom tilfeldigvis over denne konkurransen og bestemde meg for å sjå om eg kunne senda inn eit bilete. Blant bileta mine, var det eit eg syntest skilde seg ut og tenkte det kunne vera verdt å dela det. At eg skulle vinna, hadde eg likevel aldri trudd, fortel Emma Vogel.

Ein augneblink i tida

Emma Vogel er opphavleg frå Washington D.C, men flytta til Tromsø i 2018 for å ta ei mastergrad. Det utvikla seg til ei doktorgrad og no jobbar ho som postdoktor der ho forskar på kystnære marine system, med fokus på berekraft langs kysten og konnektivitet ved bruk av data frå sporing av dyr.

– I 2023 fullførte eg doktorgrada mi i dyrerørsle og marin økologi ved UiT Tromsø som omhandla korleis rørslene og åtferda til marine toppredatorar påverkar av ulike bytefelt og miljøfaktorar, forklarer ho. I samband med forskinga og registrering av kvalar, at ho tok det som skulle bli vinnarbiletet i Nature.

– Eg har alltid vore interessert i fotografering. Då eg var yngre, sa eg til alle at eg skulle bli dokumentarfilmskapar. Det å kunna fortelja ei historie ved bruk av bilete, har alltid fascinert meg, seier ho og fortel at sjølv om ho valde ein annan karriereveg, bruker ho likevel mykje fotografering i feltarbeid for å ta gode bilete av kvalane og dokumentera kjenneteikna deira.

– Når kvalane er på plass, blir tida brukt til å ta dokumentasjon til forskinga. Men som på biletet her, hadde me ein liten pause. Eg hugsar ikkje om det var fordi me venta på kvalane eller om me venta på dei rette forholda for å gjera neste oppgåve. Men eg hugsar at eg tenkte at eg syntest lyset og forholda var fine og ei flott moglegheit til å få Audun og fiskarane i eitt og same bilete, seier ho.

På den augneblinken syntest ho det var eit kult bilete. At ho skulle vinna beste forskarfoto i ein konkurranse, hadde aldri vore i tankane hennar. Audun Rilardsen er i tillegg til å vera forskar også ein anerkjend fotograf og Vogel innrømmer at ho har plukka opp nokre tips frå Rikardsen.

– Gjennom åra me har arbeidd saman, har eg fått mange tips frå Audun. Eg lærte også mykje av å sjå han fotografera kvalane. Det er eigentleg utruleg kor mykje du kan læra av å observera nokon som er dyktige i det dei gjer, fortel Vogel.

Audun Rikardsen og Emma Vogel på forskingstur Foto: Privat

Inspirert til ta fleire bilete

Når ho fekk vita at ho var vinnaren i konkurransen til Nature, vart ho mildt sagt overraska.

– Eg trudde det faktisk ikkje før eg såg namnet mitt i artikkelen til Nature. Det var veldig gøy og uventa, seier ho.

For vinnaren har dette gitt meirsmak på fotografering.

– Dette har gitt meg lysta til å ta meir bilete. Ikkje berre av dyr, men også menneske. Ikkje minst har eg fått ei viktig påminning om at forsking og forskingsarbeid også har ei menneskeleg side som er verd å ta vare på, avsluttar ho.

Eriksen, Marielle marielle.k.eriksen@uit.no Seniorrådgiver kommunikasjon og formidling

Publisert: 30.05.25 13:00 Oppdatert: 04.06.25 10:36

Arbeidsliv Bærekraft Hav