Dál sáhtát guldalit arkiivaluđiid Spotifys

Norgga árktalaš universitehtamusea bargá DigiJoik prošeavtta bokte ođđa almmuhanvuogádagaiguin ja metodaiguin vai sáhttá guldalit luđiid mat gávdnojit luohtevuorkkáin. Dál juo sáhtát gávdnat ja guldalit luđiid Luohtearkiivvas ja Digitála museas, ja guovvamánu 8.b. almmuhuvvo vuosttaš vuorkáalbuma Spotifys.

– Luohtečoakkáldagas lea stuora historjjálaš, kultuvrralaš ja musikálalaš árvu. Luđiid ja dajahusaid bokte beassá gullát oasážiid das mot árgabeaivi lei 70-jagi áigi. Musea aigu dán prošeavtta bokte dahkat nu ahte luođit leat olámuttus sihke boarráset ja ođđa buolvvaide, dadjá DigiJoik prošeaktajođiheaddji Camilla Brattland.

Camilla Brattland, Norgga árktalaš universitehtamusea, UiT. Foto: UiT

Gaskavahku guovvamánu 8.b., Romssa sámi vahku oktavuođas, bovde musea doaluide čájehit ođđa almmuhanvuogádagaid ja almmuhit vuosttaš vuorkáalbuma streamenbálvalusain. Sámi Grand Prix vuoiti Jörgen Stenberg oasálastá digitálalaččat muitalit su vásáhusaid eará luohtevuorkkáiguin. Vel dasa lassin oažžu musea guossin Bikko Nillá maŋisbohttiid geat leat mielde ádjáset albuma almmuheamis.

Albuma “Luohtevuorkkás - Bikko Nillá/Nils N. Biti - 1952” lea vuosttaš albumráiddus mii galgá almmuhuvvot prošeavtta bokte. Dat bargu juoigančoakkáldagain álggii dainna ahte Nordnorsk folkemusikksamling ásahuvvui Romssa Museas 1949is lektor Arnt Bakkes. Dat boarráseamos bádden lea juste fal 1952is gos Bikko Nillá, Nils Nilsen Biti Šuoššjávrris eret bovdejuvvui Romsii dahkat báddemiid. Son lei čeahpes juoigi guhte lávii dávjá gohččojuvvot sihke soagŋoolmmájin ja gulaheaddjin. Bikko Nillá juoiggai 71 luođi báddái čoakkáldahkii. Dáid gávnnát dál doppe gos don guldalat musihka: orcd.co/bikkonilla

– Go dát dál almmuhuvvot Spotify, Apple Music, Instagram, TikTok ja eará vuogádagaid bokte de bovdet ođđa buolvvaid váldit oasi juoiganárbevierus ja min kulturárbbis, maiddái sosiála mediaid bokte. Jus kulturárbi galgá fievrreduvvot viidáset ođđa buolvvaide, de ferte dat leahkit doppe gos nuorat leat, dadjá Ol Johan Gaup, DigiJoik prošeaktamielbargi.

DigiJoik-prošeakta bargá dál viidáset heivehit ja buoridit jiena arkiivva boarráset oasis – birrasiid 2.000 luođi mat leat báddejuvvon badjel 50 jagi áigi. Birrasiid 300 dáin almmuhuvvot DigitaltMuseum bokte dán jagi mielde, ja vuorká galgá áiggi mielde almmuhuvvot almmolaš arkiivvain numot Digitalarkivet (Sámi arkiiva) bokte.

Luohtevuorkkás: "Ođđa vuogádagat vuorkáluđiid almmuhemiide"

Gaskavahku guovvamánu 8.b dii. 18:30 Norgga árktalaš universitehtamuseas (Lars Thørings veg 10, Tromsø)

Prográmma:

- Álggahus sátnestivrejeaddjis Camilla Brattland, DigiJoik prošeaktajođiheaddji

- “Luohti DigitaltMuseum vuogádagas” Espen Nordenhaug bokte, KulturIT

- “Ođđa dulkomat ja jorgaleamit luđiin mat leat arkiivvas”

- “Leatgo vuorkkát leamaš veahkkin seailluhit Ubmisámi juoiganárbevieru? Vásáhusat Karl Tirén juoiganvuorkkáin” Jörgen Stenberg bokte, Máláge čearus.

- Ođđa album “Luohtevuorkkás - Bikko Nillá/Nils N. Biti - 1952” almmuhuvvo, Ol Johan Gaup bokte Kaféas vuvdojuvvo viidna, álohalakeahtes ja smávva borramušat.

Luohteárkiivva gávnnat DigitaltMuseumas: https://digitaltmuseum.no/owners/UMUIT-LA

Bludd, Ellen Kathrine ellen.kathrine.bludd@uit.no Kommunikasjonsrådgiver

Publisert: 07.02.23 10:40 Oppdatert: 07.02.23 11:01

Historie Kunst og kultur Urfolk