HUMSAM-prisen til Andreas Føllesdal

Føllesdal arbeider ved Institutt for filosofi og førstesemesterstudium og har gjennom mange år gitt verdifulle bidrag til utviklinga av forskingsmiljøet innan politisk filosofi og etikk.

– Han har ei særleg evne til å knyte filosofiske spørsmål til aktuelle samfunnsdebattar og til å tydeleggjere kva filosofi kan tilføre samfunnet. Han motiverer! seier instituttleiar Melina Duarte.

portertt av ev kvinne som lener seg mot en murvegg — Melina Duarte er sørs glad for å ha Føllesdal på laget. Foto: Stig Brøndbo / UiT

Prisen blir delt ut for innverknadsrik forsking på menneskerettar og demokrati, for framifrå forskingsleiing og for tverrfagleg arbeid som har brote ny grunn i skjeringspunktet mellom humaniora, juss og samfunnsvitskap.

– Eg forskar på makt og spør: Kvifor skal vi rette oss etter dei som har makt og myndigheit over oss? Vi som er underlagde maktutøving, har krav på å få vite kvifor vi bør godta makta, seier Føllesdal.

– Makta har flytta seg raskare enn grunngivinga for maktutøvinga, seier Føllesdal.

Han forskar mellom anna på heilt konkrete spørsmål som kva flyktningar som bør komme først i køen, og korleis pensjonsfondet vårt kan la vere å investere i selskap som medverkar til grove brot på menneskerettane i utlandet.

Priskomiteen skriv i grunngivinga si at Føllesdal har levert ei rekkje innverknadsrike forskingsbidrag, mellom anna om menneskerettar og demokrati. Han har òg utmerkt seg med framifrå forskingsleiing på høgt nivå.

– Andreas Føllesdal har teke politisk filosofi inn i juss og samfunnsvitskap, og han har bygd fagmiljø som er kjende langt utanfor Noreg. Han er òg ei tydeleg stemme i offentlegheita. Føllesdal er ein svært verdig mottakar av prisen, seier komitéleiar og visepreses i Akademiet, Kristin B. Aavitsland i Det Norske Videnskaps-Akademi.

– Vi set stor pris på engasjementet hans og samarbeidet med han, og gratulerer han hjarteleg med ei velfortent utmerking! seier Duarte.

Rydland, Kjetil kjetil.rydland@uit.no Kommunikasjonsrådgjevar / faggruppeleiar

Publisert: 23.10.26 09:42 Oppdatert: 23.10.26 09:58

Om UiT Samfunn og demokrati