Satsar vidare på samarbeid mellom Harstad kommune og UiT

Med arbeidsgivar på laget, kan tilsette i Harstad kommune enklare kunna ta utdanning som sjukepleiar eller vernepleiar samtidig som dei er i jobb. – Dette er ein avtale me har hatt sidan 2023. Målet er å kunna rekruttera nok arbeidskraft inn til helsesektoren i kommunen, fortel Torill Skår, kommunalsjef for helse og oppvekst i Harstad kommune.

Førre veke vart avtalen sett over og står framleis like stødig. No håpar Harstad kommune og Torill Skår at fleire tilsette vil velja å utdanna seg innan vernepleie eller sjukepleie. Med god tilrettelegging frå arbeidsgivar håpar dei å gjera det enklare og meir

Torill Skår (Stor).jpeg — Torill Skår, kommunalsjef for helse og oppvekst i Harstad kommune. Foto: Øivind Arvola/Harstad kommune

freistande for folk å ta steget mot desse viktige yrka.

– Som så mange andre kommunar, har også Harstad kommune eit sårt behov for fleire tilsette innan denne sektoren. Me håpar mange ser fordelane med denne avtalen og dermed også nyttar seg av den, fortel Skår.

Dette er avtalen

For å leggja til rette for at tilsette kan gjennomføra deltidsstudium i sjukepleie og vernepleie, ønskjer kommunen å bruka desse verkemidla:

Den tilsette får permisjon med lønn for halvparten av samlingane
Eksamensfri i samsvar med permisjonsreglementet
I praksisperiodane får den tilsette 25 % lønnsdekning
I tillegg kan den tilsette søkja stipend frå fagforeininga si
2 års bindingstid etter fullført utdanning

I tillegg til eigne tilsette rettar kommunen seg også mot framtidige arbeidstakarar gjennom å tilby rekrutteringsstillingar til sjuke- og vernepleiarstudentar ved UiT i Harstad.
Dette gjeld studentar som pr. i dag ikkje har fast stilling i kommunen, men som ønskjer å jobba medan dei utdannar seg, mot at dei får stipend i tillegg til lønn. Håpet er at gjennom å knyta studentane til ein arbeidsplass dei trivst på, så kan det bidra til at fleire vel å bli i kommunen etter enda utdanning.

Rekrutteringsstillingane får desse vilkåra:

Minimum 20 prosent fast stilling i utdanningstida
Lønn tilsvarande fagarbeidar i utdanningstida
Ekstravakter blir betalte med same lønn som den faste stillinga
Det er inga bindingstid knytt til ordninga

I tillegg får dei stipenda, mellom 15.000 og 20.000 kroner i året, avhengig av om dei bind seg for sommarjobb eller ikkje.

Hyller avtalen

Gunn Elin Fedreheim er instituttleiar på vernepleie ved Campus Harstad og hyllar kommunen for vidareføringa av avtalen.

– Det er viktig med slike avtalar med kommunen for å leggja til rette for at studentar får til kombinasjonen av arbeid og studium. Studentane får verdifulle erfaringar som dei kan kopla teorien til og bruka inn i undervisninga, og som arbeidstakar får dei verdifulle perspektiva til å vidareutvikla seg som yrkesutøvar og til å sjå på det dei gjer med nye auge. Det er ei fantastisk ordning som også tilbyr stipend til studentane og som sikrar at studentane får praksisen sin i Harstad.

Fedreheim fortel at denne avtalen kom som bestilt. Allereie 16.oktober har vernepleie på campus Harstad søknadsfrist for deltidsstudium med oppstart januar 2026. Ho håpar at avtalen kan vera så lukrativ at det vil vera utslagsgivande allereie på søknadsfristen neste veke.

– Me ser at mange studentar har utfordringar knytte til kombinasjonen av arbeid og studium. Med ei slik ordning er arbeidsgivar med på laget og bidreg med gode rammevilkår for å vera student. Me håpar at denne ordninga blir vidareført, og at me kan bidra til å sikra kompetent arbeidskraft i kommunen, og me ønskjer sjølvsagt også at ordninga blir utvida til andre kommunar. Det er stor mangel på vernepleiarar både nasjonalt, regionalt og lokalt, og dei som utdannar seg til vernepleiarar er ganske sikkert garantert jobb når dei er ferdige, og gjennom denne gode ordninga i Harstad kommune er dei garantert jobb når studiet er fullført, avsluttar ho.

Kortnytt fra

Eriksen, Marielle marielle.k.eriksen@uit.no Seniorrådgiver kommunikasjon og formidling