Ho er UiT sin første representant i Brussel
Linda Solstrand Dahlberg er på plass i Brussel. Her skal ho sørge for at UiT utnyttar moglegheitene som Noreg sitt forhold til EU byr på.
– Noreg sin relasjon til EU inneber moglegheiter for oss i FoU-sektoren, seier Linda Solstrand Dahlberg.
Ho er UiTs første Brusselrepresentant ved Nord-Noregs Europakontor.
Når Dahlberg snakkar om moglegheiter, peiker ho spesielt på EU sitt rammeprogram for forsking og innovasjon, Horisont Europa. Det er verdas største, med eit totalbudsjett over 1,2 billiardar kroner.
Horizon Europe
Eit sjuårig rammeprogram for forsking og innovasjon, og verdas største av sitt slag.
Totalbudsjett på 95,5 milliardar euro.
Har tre hovudsøyler: 1: Framifrå forsking 2: Globale utfordringar og konkurransedyktig næringsliv 3: Innovativt Europa og eit tverrgåande område.
– Eg trur det er viktig å minne oss sjølv å at vi har utruleg sterke fagmiljø på UiT. Familjø som er verdsleiande på sine felt, og som er godt eigna til å søke på EU-midlar, seier Dahlberg.
Ho meiner UiT kan bli flinkare til å tenke større, og til å jakte ambisjonar som mange hittil har latt andre jage.
Nettopp dette er noko av det Dahlberg skal bidra med frå Brussel.
– Våre miljø er sterke nok til å konkurrere på lik linje med dei. Dessutan har vi eit godt heimeapparat som støttar dei som vil søke midlar frå EU, seier Dahlberg.
– Eg skal gjere alt eg kan herifrå for at informasjonen kjem dit den skal, slik at vi kan rigge oss i god tid og for at EU og aktørar i Brussel veit meir om kva vi frå UiT og Arktis kan bidra med for å løyse våre felles samfunnsutfordringar, legg ho til.
Les Lindas brusselbrev: Konkurranseevne, innovasjonsgap og EUs neste rammeprogram
Gjer UiT synleg gjennom ulike påverknadskanalar
I år er det 20 år sidan Nord-Noregs Europakontor blei oppretta, med formål om å løfte fram og forsterke nordnorske interesser i EU. UiT Noregs arktiske universitet er ein av fleire samarbeidspartnarar.
Den nye EU-kommisjonen har uttalt at forsking og innovasjon er av høgaste prioritet, og skal vere i hjartet av Europa sin økonomi dei kommande åra.
Då blir det enda viktigare å vere til stades i Brussel, for å kunne prate direkte med representantar frå EU-institusjonane og andre som jobbar tett på prosessane.
– I kontakt med desse er det viktig å synleggjere UiT og våre styrker, seier Dahlberg.
EU har sett søkelys på globale utfordringer som klima, helse, havforvalting og det grønne skiftet. Utfordringer som UiT, Nord-Noreg, Noreg og Arktis generelt har gode idear for korleis handtere.
– Vi tilbyr arktiske løysingar på globale utfordringar. Desse er det viktig å synleggjere for EU, både gjennom direkte dialog og i fora her nede, men også gjennom sterke søknader til utlysingar i Horisont Europa og andre EU-initiativ, seier Dahlberg.
Horisont Europa, EUs niande rammeprogram for forsking og innovasjon, er ferdig i 2027. UiT jobbar saman med dei andre universiteta i Arctic 6 med eit posisjonspapir på kva dei synest er viktig å inkludere i neste rammeprogram.
Dahlberg nemner også European Ocean Pact, som EU jobbar med no og som det er mogleg å komme med innspel til.
– Dette er eksempler på område der UiT har moglegheit til å påverke, både gjennom posisjonspapir, høyringsinnspel, og direkte dialog, seier Dahlberg.
Står sterkare med samarbeidspartnarar
Ved å vere til stades i Brussel, har Dahlberg og UiT tilgang til informasjon og får vite om kommande moglegheiter. Slik kan ein rigge seg i tidleg fase, og vere klar når utlysingane kjem.
UiT har dessutan fleire gode samarbeidspartnarar som også er til stades i Brussel. Saman står ein sterkare som søkarar og bidragsytarar til felles utfordringar.
– Å få EU til å forstå nordområda betre er også viktig for oss. EU ser nordover, og ønsker å spele ei større rolle i Arktis. Då er det viktig at tiltaka er forankra i virkelegheita, og skjer i samarbeid med oss som bur i Arktis. Denne typen arbeid gjerast best i Brussel, seier Dahlberg.
I starten av Brussel-opphaldet har mykje tid gått med til å bygge nettverk og etablere samarbeid med aktørar innan forsking og innovasjon.
– Jobbar ein saman med andre, og som del av eit større nettverk, har ein ei sterkare stemme og meir påverknadskraft enn ein har aleine, seier Dahlberg.
Ho jobbar også mykje med kollegene på både Nord-Noregs og Nord-Sveriges Europakontor.
– Vi har felles ambisjonar om å kople regionane tettare på EU, og om å få EU til å fatte meir interesse og forståing for lokale forhold i det nordeuropeiske Arktis, kva aktørar og kunnskapsinstitusjonar som finst og kva ein kan bidra med, seier Dahlberg.
Direktør Nils Kristian Sørheim ved Nord-Noregs Europakontor, meiner timinga for UiTs nye Brusselkontor er god.
– Nærvær i Brussel er generelt veldig viktig. Mykje skjer her, som påverker Nord-Noreg og vår FoU-sektor, og mykje vil bli utvikla og justert i åra som kjem. Vi ønsker Linda hjarteleg velkommen til vårt kontorfellesskap, seier han til eigne nettsider.
