UiT ásaha Árktalaš humaniora guovddáža

Guovddáš lea vástádussan hástalusaide maid Dutkanráđđi lea árvvoštallan humaniora ektui Norggas. Guovddáš galgá deattuhit árktalaš humaniora ja leat oassin UiT humaniora áŋgiruššamis 2022 rájes.

– Humanisttalaš gelbbolašvuođa loktema bokte mii UiT:s juo gávdno, mii áigut dustet min áiggi ja boahtteáiggi hástalusaid, seammás go mii láhčit UiT:i vel buoret vejolašvuođa ollašuhttit iežas servodatdoaimma, dadjá Dag Rune Olsen, UiT Norgga árktalaš universitehta rektor.

Galgá koordineret birrasiid

Árktalaš humaniora guovddáža vuolggahedje Humaniora, servodatdiehtaga ja oahpaheaddjeoahpu fakultehta (HSL), Norgga árktalaš universitehtamusea ja dáiddafágaid akademiija (UMAK) ja Universitehtagirjerájus (UB). Dat lea ruhtaduvvon UiT strategalaš dutkanfoandda bokte njealji jagi áigodahkii.

Ulbmilin lea:  

čalmmustit UiT siskkáldas ja olgguldas humaniora dutkama 
láhčit dili vai UiT humaniorabirrasat váldet njunuš rolla ja eanet dutkagohtet hástaleaddji fáttáid, nu go dálkkádaga, birrasa, ceavzilvuođa ja álgoálbmotgažaldagaid
ovddidit ovttasbargogaskavuođaid UiT ovttadagaid rájáid rastá
nannet fágabirrasiid Árktalaš humaniora suorggis, masa gullá maiddái ovttasbargu eará Árktisa universitehtaiguin
ásahit nana, fágaidrasttideaddji birrasiid mat sáhttet olahit dutkanruđaid gilvaleames riikkaviidosaš ja riikkaidgaskasaš arenain

Guovddáš galgá koordineret daid iešguđetlágan humaniorabirrasiid UiT ovttadagaid rájáid rastá. Lilli Mittner, geas lea guhkes vásáhusat humaniorain, doaresfágalaš bargguiguin ja searválasráhkadeaddji proseassaiguin, virgáduvvui fágalaš koordináhtorin. Son lea hálddahuslaččat biddjon HSL fakultehtii, Nisson- ja sohkabealledutkamiid guovddážii, muhto bálvala olles universitehta. Dehálaš oassi dán barggus lea ovddidit innovašuvnna ja ođasmahttima.

Árktalaš humaniora guovddáža fágalaš koordináhtoris, Lilli Mittneris, lea guhkes vásáhusat humanioras, doaresfágalaš bargguin ja searválasráhkadeaddji proseassain. Foto: Stina Gulbrandsen

Guovddážis leat lassin fágalaš koordináhtorii stivrenjoavku, fágalaš referánsajoavku ja boarrásiidráđđi. Stivrenjoavkkus leat Anne Britt Flemmen, HSL-fakultehta dekána, Lena Aarekol, UMAK direktevra ja Johanne Raade, UB direktevra.

Referánsajoavkkus leat Silje Gaupseth, polára kulturdiehtaga vuosttašamanueansa ja Poláramusea (UMAK) beaivválašjođiheaddji, Per Pippin Aspaas, dutkanalmmuhandoarjaga fágajoavkojođiheaddji (UB), Marie-Theres Federhofer, duiska girjjálašvuođadiehtaga ja kulturdutkamiid professor ja dutkama prodekána (HSL).

Guovddáš rahppo formálalaččat juovlamánu 6. b. ja álggahuvvo ollásit ođđajagis 2024.

Kortnytt fra Senter for samiske studier, Fakultet for humaniora, samfunnsvitenskap og lærerutdanning

Mittner, Lilli lilli.mittner@uit.no Førsteamanuensis

Johnskareng, Arnstein arnstein.johnskareng@uit.no Giellakonsuleanta / Samisk språkkonsulent

Rolland, Tomas tomas.rolland@uit.no Strategisk seniorrådgiver