Joho Niillas seminára: Mo oahpahus doarju ja nanne čállima máŋggagielat árbegielkonteavsttas?

Áigi: Duorastaga juovlamánu 7. b. 2017, dii. 11.15-12.00

Báiki: Čoahkkinlatnja Guovssu TEO-H2 2.228, Sámi dutkamiid guovddáš

Vuosttaš Joho Niillas semináras doallá Hanna Outakoski ovdasága fáttás

Mo oahpahus doarju ja nanne čállima máŋggagielat árbegielkonteavsttas?

Dát postdok-prošeakta guorahallá dan mo čálamáhtu, literacy, ulbmiliid sáhttá olahit ja mo erenoamážit čállinmáhttu realiserejuvvo guovtti eamiálbmotgiela (árbegiela = heritage language) oahpahuskonteavsttas, Sámi luohkkálanjain skuvllas ja Sámi oahpaheaddjioahpus Norggas, Suomas ja Ruoŧas. Dutkamuš viggá čielggadit mo oahpaheaddjioahput ja oahpahuspraktihkat máŋggagielat oahpahuskonteavsttas nannejit ja dorjot čállima eamiálbmotgielas, ja makkár čállindiskurssat gávdnojit oahpahusa konteavsttain. Dasa lassin dutkamuš háliida oaidnit juos doaimmat mat dorjot sámegielat čálamáhtu sulastahttet doaimmaid maiguin skuvla doarju čálamáhtu eará gielain. Ruoŧa Dutkanráđđi, Vetenskapsrådet, ruhtada dán postdok-prošeavtta ovttas Ubmi universitehta Oahpaheaddjiallaskuvllain. Prošeakta lea álgán čakčat 2017 ja Romssa universitehta lea okta verddeuniversitehtain. 

Filosofiija doavttir Hanna Outakoski bargá sámegiela oahpaheaddjin ja vuosttašamanueansan Gielladutkamiid ossodagas Ubmi universitehtas Ruoŧas. Son dutká čállima oahpahusa ja čállima diskurssaid sihke skuvllas ja universitehtas. Son lea maid dutkan sámegielat ohppiid čállinproseassaid ja čállima skuvlabirrasa, sámegiela gielalaš struktuvrraid, ja su stuorra beroštupmi lea virtuála oahpahus ja 3D-birrasiid geavahus unnitlogugielaid oahpahusas. Oktavuohta hanna.outakoski@umu.se

Joho Niillas seminára lea Joho Niillasa dahje Nils Jernslettena gudnin.  Joho Niillas lei Romssa universitehta vuosttaš sámegiela professor. Son lei maiddái servodatberošteaddji, earret eará lei son sámediggeáirras, sámi vuoigatvuođalávdegotti áirras ja biibbaljorgalanbarggu jođiheaddji. Semináraráiddu ulbmil lea sámegillii gaskkustit dutkamiid ja áigeguovdilis áššiid. Sihke UiT Norgga árktalaš universitehta dutkit ja earát leat buresboahtin muitalit iežaset dutkamiid birra. Váldde oktavuođa Sámi dutkamiid guovddáža fágalaš jođiheddjiin Niklas Labbain jus háliidivččet ovdanbuktit iežat dutkama muhtun Joho Niillas semináras.

Buresboahtin!