2019 lei riikkaidgaskasaš jahki eamiálbmotgielaid váste. Giellajagi ulbmilin lei loktet eamiálbmotgielaid oidnosii máilmmiviidosaččat ja oažžut ovdan makkár váikkuhusat gielaid jávkamis leat. Giellajagi áigge bođii čielgasit ovdan ahte jahki ii leat doarvái čoavdit hástalusaid maid eamiálbmotgielat vásihit. Dan geažil jagi 2019 loahpas mearridii ON generálačoahkkin resolušuvnna mas almmuhuvvui ahte galgá lágiduvvot riikkaidgaskasaš logijahki eamiálbmotgielaid váste (International Decade of Indigenous Languages, IDIL 2022-2032).
Giellalogijagi ulbmilin lea joatkit doaimmaiguin mat álggahuvvoje giellajagi áigge (IYIL2019), ja bargat viidábut ja vuđoleappot eamiálbmotgielaid oainnusmahttimiin ja rivttiiguin, ja dainna lágiin loktet eamiálbmotgielaid stáhtusa ja sajádaga servvodagas. Loga eambbo IDIL birra dás.
Norggas leat Sámediggi ja Gielda- ja guovlodepartemeanta mearridan ásahit nationála ovttasbargoforuma nannen ja oktiiheivehan dihte IDIL čalmmustahttima. Sámediggi ja Gielda- ja guovlodepartemeanta jođihit foruma ovttas ja nammadit lahtuid guovtti jahkái háválassii.
Ovttasbargoforumis leat čuovvovaš ásahusat ovddastuvvon jagiin 2022-2024: Sámediggi, Gielda- ja guovlodepartemeanta, Máhttodepartemeanta, Norgga giellaráđđi, Sámi allaskuvla, Nuortta universitiehtta, UiT Norgga árktalaš universitehta, Divvun ja Giellatekno, Noereh ja Sámiráđđi.
Nationála ovttasbargoforum galgá váikkuhit dasa ahte sámegielat leat lunddolaš oassin Norgga servodagas, ja ahte addojuvvo vejolašvuohta oaidnit, gullat, oahppat ja geavahit sámegielaid árgabeaivvis. IDIL 2022-2032 vuosttaš áigodagas leat Sámedikkis ja Gielda- ja guovlodepartemeanttas guokte váldovuoruheami: giellateknologiija/digitaliseren ja mánáid ja nuoraid giella. Jos dán suorggi mihttomeriid galggaš joksat, de lea ovttasbargu riikkarájiid rastá dehálaš, lassin riikkalaš rahčamušaide.
Loga Norgga nationála doaibmaplána riikkaidgaskasaš álgoálbmotgielaid logijagi váste (dárogillii).