Joho Niillas seminára golggotmánu 25. beaivvi 2023

(Senter for samiske studier inviterer til Joho Niillas seminar onsdag 25. oktober 2023 kl. 11.00-13.00. Formålet med Joho Niillas seminarene er å skape en arena for å diskutere faglige tema på samisk. Vi serverer kaffe og te.)

Áigi: Gaskavahku golggotmánu 25. b. 2023, dii. 11.00-13.00

Báiki: Čoahkkinlatnja Guovssu TEO-H2 2.228, Sámi dutkamiid guovddáš (seminára sáhttá maiddái čuovvut neahta bokte) 

Sáhkavuorut:

Berit Anne Bals Baal, UiT Norgga árktalaš universitehta: Dárogielsánit sámegielas
Čoahkkáigeassu:
Sámegielas leat ollu loatnasánit mat bohtet dárogielas. Muhtumat dain leat áigá boahtán gillii ja earát fas leat ođđaseappot. Muhtin sániid lea normerenorgána dohkkehan, nu ahte dat leat oassin gielas, nugo omd. dihtor. Buot dárogielsánit mat geavahuvvojit sámegielas, eai dattege leat goassege dohkkehuvvon, muhto geavahuvvojit beaivválaččat, nugo spillet ja jukset. Dáid sániid sajádat gielas lea eahpečielggas. Sáhkavuorus geahčan movt dutkamat leat gieđahallan dákkár sániid, makkár iešvuođat dáin sániin leat ja movt dat heivehuvvojit gillii.

Lene Antonsen, UiT Norgga árktalaš universitehta: Davvi-Romssa suopmanat duortnusámi suopmanin
Čoahkkáigeassu: 
Davvi-Romssa árbevirolaš sámi suopmanat, earret Návuona suopmana, gullet duortnussámi suopmanjovkui, masa gullet davvisámegiela lulimus suopmanat. Áiggun muitalit muhtun Davvi-Romssa suopmaniid suopmanmearkkaid mat čatnet suopmaniid duortnussámi suopmanjovkui, ja áiggun maiddái čájehit ahte Návuona sámegielas leat sihke mearrasámi ja duortnussámi suopmanmearkkat.

Lisa Monica Aslaksen, UiT Norgga árktalaš universitehta: Servodatkritihkka boarrásat sámi girjjálašvuođas
Čoahkkáigeassu: 
Dán logaldallamis áiggun muitalit man láhkai servodatkritihka boahtá ovdán muhtun čáppagirjjálašvuođa- ja áššeprosateavsttain mat almmuhuvvo 1800-logu ja álgo 1900 logus.

Sáhkavuorut leat dušše sámegillii ja eai dulkojuvvo (foredragene er bare på samisk og vil ikke bli tolket).
 
Joho Niillas seminárat lea Joho Niillasa dahje Nils Jernslettena gudnin. Joho Niillas lei Romssa universitehta vuosttaš sámegiela professor. Son lei maiddái servodatberošteaddji, earret eará lei son sámediggeáirras, sámi vuoigatvuođalávdegotti áirras ja biibbaljorgalanbarggu jođiheaddji.

Semináraid ulbmil lea sámegillii gaskkustit dutkamiid ja áigeguovdilis áššiid. Sihke UiT Norgga árktalaš universitehta dutkit ja earát leat buresboahtin muitalit iežaset dutkamiid birra.

Sáhttet boahtit rievdadusat!

Lea maiddái vejolaš čuovvut seminára Zoom bokte:

Join Zoom Meeting
https://uit.zoom.us/j/62617261581?pwd=eFJzSVRkbFhDVSs3M2JSNnNNU3ZoQT09

Meeting ID: 626 1726 1581
Password: 329968