Sámi dutkamiid guovddáš bovde goalmmát Joho Niillas seminárii njukčamánu 10. beaivvi dii. 12.15-13.00. Logaldallit: Linda Wiechetek, Thomas Omma ja Sjur Moshagen, UiT Norgga árktalaš universitehta.
Áigi: Disttaga njukčamánu 10. b. 2020, dii. 12.15-13.00
Báiki: Čoahkkinlatnja Guovssu TEO-H2 2.228, Sámi dutkamiid guovddáš
Linda Wiechetek, Thomas Omma ja Sjur Moshagen, UiT Norgga árktalaš universitehta, logaldallet fáttás
GramDivvun – Ollu eanet go čállindárkkisteapmi
GramDivvun 1.0, mii gieskat almmuhuvvui, lea prográmma mii divvu sihke čállinfeaillaid, grammatihkkafeaillaid ja formaterenfeaillaid. Dán logaldallamis mii muitalit maid ođđa prográmma máhttá, mo viežžat dan, hástalusaid birra ja boahtte áiggi plánaid birra.
Dát lea goalmmát logaldallan 6 logaldallamis Joho Niillas semináraráiddus 2020 giđa.
Bures boahtin!
Lea vejolaš čuovvut logaldallama Skype for business dahje neahttalohkanprográmma (omd. Chrome) bokte:
Sáddes dieđu Arnstein Johnskarengii, arnstein.johnskareng@uit.no, ja de oaččot bovdejumi searvat logaldallamii Skype bokte.
Ávžžuhat ahte leat gearggus laktet iežat logaldallamii maŋimustá dii 12.10 (Norgga áigi), 5 minuhta ovdalgo logaldallan álgá.
FUOMÁS! Jus ii leat Skype for business mášiinnas, de fertet bovdejumis deaddilit “WebApp”, ja mášiidna viežžá dalle prográmmii lasáhusa (“plugin”). Dán lasáhusa fertet diktit installerejuvvot mášiidnii. Go de leat dohkkehan lasáhusa, de sáhtát čuovvut logaldallama omd. Chrome neahttalohkanprográmma bokte. Mikrofuvnna fertet časkit eret logaldallama vuolde, muđui šaddá linnjás ollu riedja.
Lea vuosttas háve mii geahččalat dán láhkai, ja bivdit áddejumi jus mat ii buot mana nu mo galgá teknihkalaččat.