Akademalaš čállinkursa

UiT Norgga árktalaš universitehta ja Sámi allaskuvla lágidit ovttas akademalaš čállinkurssa 2019 giđđalohkanbaji. Ođđa ohcanáigemearri lea 1.2.19.

Kursa lea oaivvilduvvon buot dieđasurggiid dutkiide ja doavttirgráda­studeanttaide, geat čállet sámegillii ja leat čállime dieđalaš artihkkala sámegillii. Ulbmilin lea ahte oasseváldit kurssa áigge čállet dieđalaš artihkkala, maid fállet maŋŋel omd. Sámi dieđalaš áigečállagii.

Kurssas leat golbma váldofáttá: dieđalaš artihkkala huksehus, sámegiella dieđalaš giellan ja giellateknologiija veahkkin sámegiela dieđalaš čállimis. Ovdal go kursa álgá, de galgá dutkama sisdoallu leat válmmas, ja artihkkala čuolbma, metoda, teoriija ja bohtosat galget leat sajis. Kurssa áigge oasseváldit barget viidáseappot artihkkaliin. Kurssas leat várrejuvvon guokte olles beaivvi čállimii. Kursa lágiduvvo davvisámegillii, ja buot bagadallan addojuvvo davvisámegillii.

Kursa lágiduvvo guoktin čoagganeapmin:

  • Vuosttaš čoagganeapmi lágiduvvo Jergul Asttus guovvamánu 25.-27. beivviid 2019. Kursa álgá mánnodaga 25.2. dii. 12 ja bistá gaskavahkkui­ 27.2. dii. 12 rádjai.
  • Nubbi čoagganeapmi lea Sommarøyas miessemánu 6.-8. beivviid 2019. Kursa álgá mánnodaga 6.5. dii. 12 ja bistá gaskavahkkui 8.5. dii. 12 rádjai.

Lágideaddjit gokčet orrun-, biebmo- ja mátkegoluid. Mátkegolut gokčojuvvojit Guovdageainnu ja Romssa rájes.

Kurssa oahpaheaddjit leaba Lene Antonsen ja Nils Oskal.

Ohcamis galget leat dát dieđut: ohcci namma, ásahus, akademalaš gráda, fágasuorgi, vuordámušat čállinkursii ja áššit maiguin dárbbaša eambbo bargat. Ohcama mielddusin galgá sáddet čállosa (unnimusat guokte siiddu) mas leat dutkama čuolbma, metoda, teoriija ja bohtosat. Ohcci lea geatnegahtton čađahit olles kurssa ja searvat goappašiid čoagganemiide. 

Fuomáš! Ođđa ohcanáigemearri lea guovvamánu 1. beaivi 2019. Ohcan sáddejuvvo kursaoahpaheaddjái Lene Antonsenii lene.antonsen@uit.no.

Kurssas lea sadji 10 oasseváldái.

Eanet dieđuid kurssa birra addiba Lene Antonsen, lene.antonsen@uit.no ja Nils Oskal, nils.oskal@samiskhs.no.

Norgga dutkanráđđi lea dorjon kurssa lágideami.

Starter: 25.02.19 kl 12.00
Slutter: 27.02.19 kl 12.00
Hvor: Jergul Astu/ Sommarøy
Sted: Tromsø, Annet
Målgruppe: Ansatte, Studenter, Gjester / eksterne
Lenke: Klikk her
Kontakt: Lene Antonsen
Telefon: 776 46 519
E-post: lene.antonsen@uit.no
Legg i kalender