Sámi dutkamiid guovddáš bovde Joho Niillas seminárii guovvamánu 8. beaivvi dii. 12.15-13.00. Logaldalli: Nils Oskal, Sámi allaskuvla. Mii guossohit gáfe ja deaja. Dát lea vuosttáš logaldallan Joho Niillas semináraráiddus 2022.
(Senter for samiske studier inviterer til Joho Niillas seminar tirsdag 8. februar 2022 kl. 12.15-13.00. Formålet med Joho Niillas seminarene er å skape en arena for å diskutere faglige tema på samisk. Vi serverer kaffe og te.)
Áigi: Maŋŋebárgga guovvamánu 8. b. 2022, dii. 12.15-13.00
Báiki: Čoahkkinlatnja Guovssu TEO-H2 2.228, Sámi dutkamiid guovddáš (lea sadji maks. 16 olbmuide korona geažil)
Nils Oskal, Sámi allaskuvla, logaldallá fáttás
Alf Isak Keskitalo artihkkala «Research as an interethnic Relation» (1976) vuostáiváldin- ja váikkuhushistorjá
Alf Isak Keskitalo filosofalaš duogaš ii leat kritihkalaš hermeneutalaš filosofiija dehe positivisma kritihkalaš dieđateoriijat, mat muđui ledje áigeguovdilat 1970 logiin. Keskitalo geavaha analytalaš giellafilosofiija vuođđun moaitit servodatdiehtagiid iešipmárdusa. Logaldallamis čilgen artihkkalaš giellafilosofalaš duogáža, movt artihkal ipmirduvvui ja vuostáiváldui ja makkár váikkuhushistorjá das lea.
FUOM! Dán logaldallama ii leat vejolaš čuovvut neahttalogaldallamin.
Dát lea vuosttáš logaldallan Joho Niillas semináraráiddus 2022.
Joho Niillas seminárat lea Joho Niillasa dahje Nils Jernslettena gudnin. Joho Niillas lei Romssa universitehta vuosttaš sámegiela professor. Son lei maiddái servodatberošteaddji, earret eará lei son sámediggeáirras, sámi vuoigatvuođalávdegotti áirras ja biibbaljorgalanbarggu jođiheaddji.
Semináraráiddu ulbmil lea sámegillii gaskkustit dutkamiid ja áigeguovdilis áššiid. Sihke UiT Norgga árktalaš universitehta dutkit ja earát leat buresboahtin muitalit iežaset dutkamiid birra.
Bures boahtin!