Sámi dutkamiid guovddáš bovde nuppi Joho Niillas seminárii guovvamánu 18. beaivvi dii. 12.15-13.00. Logaldalli: Lene Antonsen, Norgga árktalaš universitehta.
Áigi: Disttaga guovvamánu 18. b. 2020, dii. 12.15-13.00
Báiki: Čoahkkinlatnja Guovssu TEO-H2 2.228, Sámi dutkamiid guovddáš
Lene Antonsen, Norgga árktalaš universitehta, logaldallá fáttás
“Lei niogtyve go byggiimet” – mo eanetlogugiella ihtá LIA Sápmi hállangiellakorpusis
Čoahkkáigeassu:
Áiggun čájehit hállangiellakorpusa LIA-Sápmi (Language Infrastructure Made Accessible), maid Oslo universitehta, ja UiT lea oassálastán bargui. LIA-Sápmi-čoakkáldagas leat transkriberejuvvon jietnabáttit, oktiibuot 190 000 sáni. Materiála lea báddejuvvon áigodagas 1951–1995, informánttat leat riegádan áigodagas 1865–1971, ja orrot 16 davvisámi guovllus. Sihke dutkit ja studeanttat sáhttet geavahit LIA-Sápmi.
Go guorahallá vehádatgiela materiálaid lingvisttalaččat, erenoamážit go lea njálmmálaš gielas sáhka, de lea dárbu maiddái váldit vuhtii eanetlogugiela danne go dábálaš hállangielas leat sihke spontána loatnasánit ja kodamolsumat eanetlogugillii. Lean guorahallan mo majoritehta giella ja spontána loatnasánit geavahuvvojit olles LIA-Sápmi materiálas, ja áiggun presenteret dan analysa.
Dát lea nubbi logaldallan 6 logaldallamis Joho Niillas semináraráiddus 2020 giđa.
Bures boahtin!
Lea vejolaš čuovvut logaldallama Skype for business dahje neahttalohkanprográmma (omd. Chrome) bokte:
Sáddes dieđu Arnstein Johnskarengii, arnstein.johnskareng@uit.no, ja de oaččot bovdejumi searvat logaldallamii Skype bokte.
Ávžžuhat ahte leat gearggus laktet iežat logaldallamii maŋimustá dii 12.00, 15 minuhta ovdalgo logaldallan álgá.
FUOMÁS! Jus ii leat Skype for business mášiinnas, de fertet bovdejumis deaddilit “WebApp”, ja mášiidna viežžá dalle prográmmii lasáhusa (“plugin”). Dán lasáhusa fertet diktit installerejuvvot mášiidnii. Go de leat dohkkehan lasáhusa, de sáhtát čuovvut logaldallama omd. Chrome neahttalohkanprográmma bokte. Mikrofuvnna fertet časkit eret logaldallama vuolde, muđui šaddá linnjás ollu riedja.
Lea vuosttas háve mii geahččalat dán láhkai, ja bivdit áddejumi jus mat ii buot mana nu mo galgá teknihkalaččat.