Sámi giellastipenda

SEMINARII LAPPONICI FOND – SÁMEGIELLA OAHPAHEADDJEOAHPUS/LEKTOROAHPUS

Seminarii Lapponici Fond ásahuvvui njukčamánu 24. beaivvi 1752.
Sámi allaskuvla hálddaša foandda, ja foandda sisaboađus juolluduvvo stipeanda studeanttaide geat lohket sámegiela oassin oahpaheaddjeoahpus/lektoroahpus. Stipeanda juhkkojuvvo Sámi allaskuvlla, Finnmárkku allaskuvlla, Nesna allaskuvlla, Romssa universitehta, Nordlándda universitehta ja Davvi-Trøndelaga allaskuvlla studeanttaide.

2012:is almmuha Seminarii Lapponici Foandda stivra
3 stipeandda á Nkr 15 000,-.

Stipeanda juhkkojuvvo studeanttaide geat lohket sámegiela oassin dábálaš- dahje vuođđooahpaheaddjioahpus/lektoroahpus. Stipeandda ulbmil lea nannet oahpaheaddjedili dain guovlluin gos sámegiella ja/dahje sámit leat unnitlogus, ja gos lea stuora dárbu oahpaheddjiide geain lea gelbbolašvuohta sámegielas. Dát sáhttet leat sámi studeanttat Norggas, Ruoŧas, Suomas ja Ruoššas (miehtá sámi perspektiiva).

Go stipeanda juhkkojuvvo, de deattuhuvvo ahte studeanta sáhttá čájehit árjjalaš servodatberoštumi ovdamearkka dihte oasálastin sámi ja/dahje eamiálbmot organisašuvdna- ja/dahje kultureallimis. Eará bealit studeantta servodatberoštumis sáhttet maiddái deattuhuvvot.

Ohcanáigemearri lea čakčamánu 15.b.2012.

Ohcan sáddejuvvo/addojuvvo Endre Mørck, Gielladiehtaga instituhtta, Romssa universitehta. Ohcamis fertejit čuovvovaš dieđut boahtit ovdan:
• Lea go ohcci sámi sohkii gullevaš.
• Hálddaša go ohcci ovttage sámegiela njálmmálaččat.
• Ohcci ferte duođaštit makkár oahppu sus dán rádjái lea sámegielas.
• Ohcci ferte duođaštit makkár oahpaheami sámegielas son áigu čađahit allaskuvllas/universitehtas.
• Goas ohcci lea álgán dábálaš- dahje vuođđoskuvllaoahpaheaddjeohppui/lektorohppui ja goas áigu gárvvistit oahpus.
• Ohcci ahki ja orrunbáiki.
• Geahčus mii čájeha ja duođašta ohcci servodatberoštumi omd. eamiálbmot dahje sámi organisašuvdna- ja/dahje kultuvradoaimmain (luohttámušolbmodoaimmat, teahter, girječállin, čájahusat, valáštallan, oktavuođat eará eamiálbmogiiguin, giellagelbbolašvuohta man bokte váldá oktavuođa/gulahallá eará eamiálbmogiiguin, ja eará).
• Dieđut eará ruhtadoarjagiid (stipeanddaid) birra maid lea ožžon eará stipeandjuolludeddjiin.
• Dokumentašuvdna dálá studeantastáhtusa birra.

Lagat dieđuid sáhttá oažžut Sámi allaskuvllas Elisabeth Blindas.

Stipeanda juhkkojuvvo 5. Beaivvi golggotmánus 2012.