SAMINOR oassálastiide
Mii bovdet buohkaid gaskal 40 ja 79 jagi geat ásset gielddain gos SAMINOR 3 čađahuvvo searvat iskkadeapmái. Beroškeahttá sohkabealis, dearvvašvuođas dahje kultuvrralaš duogážis. Lea eaktodáhtolaš ja nuvttá searvat.
Go searvvat de deavddát jearahallanskovi iežat birra ja finat álkes dearvvašvuođaiskkadeamis min dutkanstašuvnnas.
Sii geat bovdejuvvojit ožžot reivve poasttas mas lea
- neahttačujuhus digitála jearahallanskovvái. (Sidjiide geat leat boarráseappo go 70 jagi, sáddejuvvo jearahallanskovvi báberhámis)
- diehtu gos ja goas leat bovdejuvvon boahtit fysalaš iskkadeapmái gos oaččut álkes dearvvašvuođaiskkadeami
- dieđut iskkadeami birra
Jus ii heive boahtit dalle go leat bovdejuvvon, de sáhtát boahtit vaikko goas min rahpanáiggiid siskkobealde. Geahča rahpanáiggiid ja goas mii boahtit du suohkanii.
Jus it hálit searvat, de it dárbbaš maidege dahkat. Mii sáddet guokte reivve ja SMS-muittuhusa. Dan maŋŋá mii eat sádde šat maidege.
Jus leat gažaldagat de sáhtát riŋget dahje sáddet midjiide dieđu +47 406 49 469, dahje sáddes e-poastta saminor@uit.no. Telefonáiggit leat árgabeivviid dii. 10.00-14.00.
Buohkat geat servet iskkadeapmái leat mielde vuorbádeamis ja sáhtát vuoitit el-sihkkela, valáštallangiehtadiimmo ja eará fiinna vuoittuid. Mii almmuhit vuoittu iežamet neahttasiidduin ja váldit oktavuođa vuitiin. Du persovdnasuodjalus vuhtiiváldojuvvo.
Na čađahuvvo iskkadeapmi
- don deavddat jearahallanskovi digitálalaččat dahje báberhámis
- don boađát min lusa fysalaš iskkadeapmái dan suohkanis gos orut. Iskkadeapmi ádjána sullii 40 minuhta. Lassiiskkadeapmi sidjiide geat leat gaskal 70-79 jagi ádjána sullii 30 minuhta.
Na čađahuvvo fysalaš iskkadeapmi
- mii mihtidit allodaga ja deattu, birramihtu seakkáža ja alimiid bokte, váimmu ritmma (EKG), varradeattu ja váimmu ravkasa (pulsa) go leat muosis, giehtačárvema. Oasseváldit badjel 70 jagi bovdejuvvojit liige iskkadeapmái gos iskat balánssa, doaibmanávccaid dego čohkkedit ja čuoččahit, muittu ja konsentrašuvnna
- mii mihtidit geahppáid kapasitehta (spirometri) muhtin dihto oasseváldiin
- muhtin oasseváldiid jearrat atnit akitivitehtamihtu ovtta vahku
- mii jearrat oasseváldiin attáše go varraiskosiid, gožžaiskosa ja vuoktaiskkosa
Daid dieđuid oaččut iežat birra
maŋŋel iskkademiid oaččut diehtit bohtosiid iežat mihtidemiid ja muhtin ráje varraanalysain nu movt varraproseantta, guhkesáiggi varrasohkkara meriid. Jus muhtin dáin mihtidemiin čájeha dárbbu medisiinnalaš dikšui, de ávžžuhuvvot mannat doaktára lusa. Don sáhtát válljet ahte it siđa alccet čájehit iskosiid bohtosiid
Buot dieđut maid attát iskkadeamis vurkejuvvojit dorvvolaččat databásii man datagieđahalli lea UiT Norgga árktalaš universitehta. Buot dieđut ja iskosat vurkejuvvojit almmá nama ja riegádannummara haga. Dat mearkkaša ahte du ii sáhte identifiseret ja ahte dutkit eai beasa diehtit gii don leat. Buot bargiin lea maid jávohisvuođageatnegasvuohta. Dieđut mat čohkkejuvvojit galget adnot boahttevaš dutkamii. Dutkanprošeavttat mat háliidit anit SAMINOR dieđuid fertejit ohcat lobi. Dás sáhtát lohkat eambbo persovdnasuodjalusa, dutkamuša ja mieđáhusa birra.
Du oassálastin lea mávssolaš oallugiidda!
Go searvvat, de leat deaŧalaš veahkkin dearvvašvuođadutkamii. Guorahallama bohtosat sáhttet muitalit olu álbmoga dearvvašvuođadili birra, ja dat dieđut leat deaŧalaččat suohkaniidda, gielddaide, fylkkagielddaide, dearvvašvuođaeiseválddiide ja Sámediggái. Daid dieđuid sáhttet atnit bidjat johtui doaimmaid mat addet álbmogii buoret dearvvašvuođa ja heivehuvvon dearvvašvuođabálvalusaid.
