Gruppeleiarmøte 11.-12. februar 2005

Referat frå gruppeleiarmøte for Nordisk dialektsyntaks – ScanDiaSyn i Lund, 11.-12. februar 2005

Stad:
Lilla Hotellet i Lund

Gruppeleiarane (med nokre fleire) Foto: Hotelleigaren

Til stades:
- Lars-Olof Delsing, SE
- Christer Platzack, SE
- Henrik Rosenkvist, SE
- Jan-Ola Östman, FI
- Karen Margrethe Pedersen, DK
- Sten Vikner, DK
- Höskuldur Þráinsson, IS
- Tor A. Åfarli, NO
- Janne Bondi Johannessen, NO
- Gunnar Hrafn Hrafnbjargarson, NO
- Øystein Alexander Vangsnes, NO
- Þórhallur Eyþórsson, IS (fredag)


Overordna dagsorden for møtet var varsla å vere (sitat frå innkallinga):

- Gjøre opp status for prosjektet så langt: hva er gjort, hvilke ressurser har vi til rådighet og hva kan vi gjøre for å skaffe til veie ytterligere ressurser?
- Diskutere praktiske sider vedrørende databasen m.m.: organisering av materiale, transkripsjon, presentasjon osv.
- Planlegge utarbeidelsen av spørreskjema og diskutere innsamlingsmetoder generelt.
- Fordele oppgaver.


Fredag 11. februar:

Øystein opna møtet klokka 13.30; dagsorden vart godkjent.

Status quo/ressursar:
Øystein gav eit oversyn over status til ScanDiaSyn per dags dato. Prosjeket har ved starten av 2005 hatt/fått støtte frå NOS-HS, NordForsk (tidl. NorFA), Vetenskapsrådet (Sverige), Rannís (Island), Nordplus språk, Nordens språkråd. Totalt er støtten på rundt 422000 euro for 2005, og i underkant av dette for kvart av åra 2006 og 2007 (beløpa inkluderer òg ei dialektsyntaktisk stipendiatstilling ved Universitetet i Tromsø). Søknaden til det norske forskingsrådet (NFR) har fått avslag. Ulike kjelder og strategiar for vidare finansiering av prosjektet vart diskutert, bl.a. Interreg (EU) og Nordisk kulturfond. Christer observerte at prosjektet har relativt bra med ressursar for å drive nettverk m.m., og at midlar for å drive konkret lingvistisk forsking er viktigast no.

Prosjektets heimeside (http://scandiasyn.uit.no):
Det vart diskutert ulike måtar denne kan bli oppgradert på, bl.a. ved at kvar nettverksgruppe får sin eigen bolk. Meir informasjon vil komme frå prosjektleiaren med det første.

Nordic Center of Excellence in Microcomparative Syntax (NORMS):
Forholdet mellom NORMS og ScanDiaSyn vart diskutert. Øystein meinte at det er rimeleg å sjå på ScanDiaSyn som eit empirisk og teoretisk orientert prosjekt som skal ”fore” NORMS, som skal vere orientert mot teoretisk ”excellence”.

Stormøtet:
Det er planlagt eit stormøte i Leikanger 24.-28. august 2005. Kvar gruppe sender tre eller fire medlemmer (leiaren og to eller tre PhD-studentar eller yngre forskarar). Det vil også bli invitert lingvistar frå dei relaterte utanomnordiske prosjekta. Som ein del av møtet blir det arrangert ein workshop/dugnad der spesielt PhD-studentar og yngre forskarar kan halde innlegg. Det vart også diskutert å invitere ein eller to personar som kan snakke om det å arbeide i nettverk/store prosjekt. Spørjeskjema som skal brukast i prosjektet, skal vere utvikla før dette møtet.

Databasen:
Gunnar orienterte om sitt arbeid med databasen (hausten 2004) og gav eksempel på bruk av denne. Diverse ønske frå dei ulike gruppene når det gjeld databasens vidare utforming (søkeparametrar etc.), vart lufta. Det vart poengtert at det er viktig at databasen har stor fleksibilitet (etter modell frå Oslo-korpuset).

Det islandske pilotprosjektet:
Höskuldur gav ein rapport frå det islandske pilotprosjektet for studiar av datainnsamlingsmetodar. Ulike konkrete metodar for datainnsamling og problem i samband med det vart diskutert på basis av dette, bl.a. bruk av spørjeskjema kontra intervju, om faren for å ”slite ut” informantane med for mange oppgåver etc. Diskusjonen gikk etter kvart over i ein ”brainstorming” om utforming av spørjeskjema, bruk av informantar etc.

Møtets første dag vart avslutta klokka 18.00.


Laurdag 12. februar:

Møtet starta klokka 9.00.

Datainnsamling:
Diskusjonen tok opp tråden frå dagen før med spørsmål og problem omkring datainnsamling. Det er ei målsetting at kvar enkelt gruppe utfører datainnsamling for alle dei andre gruppene. Ein fare med dette er at undersøkinga på kvart enkelt målepunkt blir svært omfattande, og at presset på den enkelte informanten blir svært stort. Etter ein lengre diskusjon om kva variablar som bør vere relevante for utvelginga av informantar, vart det konkludert med at geografisk plassering, alder og kjønn er kjernevariablane som alle gruppene bør ta omsyn til. Det vart også konkludert med at dei ulike utvelgingskriteria skal vere målsettingar og ikkje absolutte kriterium. Kvart målepunkt bør t.d. ta med både unge og eldre informantar, men dersom ei gruppe vurderer det slik at aldersspreiing ikkje er relevant for sitt område, kan dei bruke aldersmessig einsarta informantar. Som minstemål bør det ved kvart målepunkt samlast inn materiale frå eldre talarar med lita eller inga utdanning. Innsamlinga av materiale i samband med SweDia 2000-prosjektet kan elles fungere som ei generell rettesnor.

Spørjeskjema og frie opptak:
Her vart det diskutert nærmare kva syntaktiske emne/fenomen/strukturar som skal undersøkast, og korleis dei skal fangast opp i spørjeskjemaet og i dei frie opptaka. Emna blir grupperte i fem overordna kategoriar: forfelt, midtfelt, sluttfelt, ekstraposisjon, nominal. Det vart bestemt at dei ulike gruppene skal melde frå til prosjektleiaren (Øystein) om kva emne dei vil undersøke, og dei skal også utarbeide framlegg til testsetningar; dessutan også framlegg til relevant litteratur om sitt emne. Frist: 1. mai 2005. Det vart også diskutert ulike metodar for frie opptak (t.d. om ein skal bruke berre lydopptak eller videoopptak) og diverse vanskar med det (t.d. korleis sikre god opptakskvalitet). Eit minimumskrav er at opptaka er digitale.

Transkripsjon:
Det var ein lengre diskusjon om kva prinsipp ein skulle legge seg på i transkripsjonen. Skal ein t.d. bruke ein standardspråkleg transskripsjon med annotasjonar eller ein uttalenær transskripsjon, evt. med annotasjonar. Her utkrystalliserte det seg ikkje ein konsensus, og problemet må diskuterast vidare. Det vart poengert at det bør vere enkel tilgang til lydfilene.

Møtet vart avslutta ca. klokka 16.00.



Referent: Tor A. Åfarli