VID-6088 Norsk 1 for 5-10 trinn, del 1: Språkdidaktikk - 15 stp

Emnet legg vekt desse områda:

Norsk i endring i skrift og tale

Basert på kunnskap om språkhistorie og dagens forhold ser vi på utvikling av mangfaldet i den norske språksituasjonen, og korleis norsk språk blir påverka av det multikulturelle samfunnet. Tema frå sosiolingvistikk og dialektologi vil vise at språk i bruk er språk i endring. Samiske perspektiv i norskfaget er også ein del av denne verkelegheita.

Skriving og tekst

Området omfattar utforsking og drøfting av skriving og tekst i ulike sjangrar, for ulike formål og i ulike fag. Respons i skriveprosessen og vurdering av tekst blir diskutert med utgangspunkt i elevtekstar og studentane sine eigne skriveprosessar. Samanhengen mellom munnlege og skriftlege prosessar blir vektlagt.

Kunnskap om og utforsking av språk

Området omfattar kunnskap om språket som system og språket i bruk, samt evne til å nytte denne kunnskapen i praksis. For å kunne diskutere tekstar, må studentane ha eit omgrepsapparat knytt til ulike sider av grammatikken og tekstgrammatikken.

Opptakskrav er fullført lærarutdanning, praktisk-pedagogisk utdanning eller anna pedagogisk utdanning som gjer ein kvalifisert til å arbeide på 5.-10. trinn.

Det er gunstig, men ikkje eit krav for opptak, at deltakarane er tilsette på 5.-10. trinn i grunnskolen. Tilsetting på 5.-10. trinn gjer det mogleg å prøve ut opplegg eins eigen klasse.

Søknad må registrerast på EVU-web ved UiT innan 15. april. Lærare skal ikkje lenger søkje gjennom Udirs søknadssystem.

Emnet blir tilbode med atterhald om tilstrekkeleg talet på kvalifiserte søkjarar.

Kunnskapar

Studentane skal:

• ha innsikt i korleis elevar kan vidareutvikle grunnleggande språkferdigheiter og gode skrivestrategiar.
• ha innsikt i språket si rolle som identitetsmarkør.
• Ha innsikt i samiske perspektiv i norskfaget.
• ha innsikt i sidemålsdidaktikk.
• ha kunnskap om nyare norsk språkhistorie og gjeldande normering av nynorsk og bokmål.
• ha kunnskap om grammatikk, som system og som reiskap for å analysere og vurdere elevtekstar.

Ferdigheiter

Studentane skal:

• kunne bruke læreplanen i faget til å formulere mål for norskopplæringa og relevante kriterium for rettleiing og vurdering.
• kunne stimulere elevar til variert munnleg og skriftleg bruk av språket.
• kunne bruke relevante metodar og ny teknologi på måtar som fremjar samarbeid og fagleg progresjon i den vidare lese- og skriveopplæringa.
• kunne kartlegge og vurdere lese- og skriveferdigheiter og gi læringsfremjande respons til alle elevar.
• kunne skrive akademiske fagtekstar på nynorsk og leggje til rette for og gjennomføre undervisning på nynorsk.

Kompetanse

Studentane skal:

• kunne planlegge, grunngi, gjennomføre og vurdere opplæring i norsk i samsvar med læreplanen for grunnskolen og fagdidaktisk forsking.
• kjenne til fagdidaktisk forsking og utviklingsarbeid og kunne drøfte forskingsetiske problemstillingar.
• ha innsikt i norskfaget og faget sin historie, og kunne reflektere kritisk og konstruktivt ut frå slike perspektiv på faget.

Emnet er samlingsbasert med inntil tre samlingar à inntil tre dagar. På samlingane vil undervisninga bli lagt opp rundt forelesingar, diskusjonar, obligatoriske munnlege framføringar og rettleiing knytt til obligatorisk arbeid. Mellom samlingane må studentane rekne med å bruke mykje tid til individuelt arbeid og i grupper.

Gjennom heile emnet blir det lagt opp til at studentane som har moglegheit til det, kan utvikle fagleg kunnskap og forståing, språklege ferdigheiter og fagdidaktisk kompetanse gjennom praksis i eigne klasserom.