Joho Niillas seminára: Mii lea duogáš otná Sámedikkiide?


Sámi dutkamiid guovddáš bovde Joho Niillas seminárii guovvamánu 4. beaivvi dii. 11.15-12.00. Boađe guldalit go Niklas Labba muitala otná Sámedikkiid duogáža birra. Váldde mielde niestti, mii guossohit gáfe ja deaja.

Niklas Labba muitala otná Sámedikkiid duogáža birra. Foto: Priváhta.

Áigi: Mánnodaga guovvamánu 4. b. 2019, dii. 11.15-12.00

Báiki: Čoahkkinlatnja Guovssu TEO-H2 2.228, Sámi dutkamiid guovddáš

Niklas Labba doallá ovdasága fáttás

Mii lea duogáš otná Sámedikkiide, ja mo huksejit Sámedikkit luohttevašvuođa sámeálbmoga ja stáhtaeiseválddiid gaskkas? Mo váikkuhuvvo Sámedikki jienasteddjiid árgabeaivi Sámedikkiid politihkas Suomas, Norggas ja Ruoŧas? 

Davviriikkaid stáhtat leat huksen Sámedikkiid ja ruhtadit Sámedikkiid iežaset dárbbuid ektui. Suoma stáhta dárbbašii ráđđeaddilávdegotti sámi áššiide 1960-logus. Norgga stáhta, maŋŋel Álaheaju-/Guovdageaineanu stuimmiid, ohcalii oktasaš sámi jiena mii váldá ovddasvástádusa ja mas lea luohttevašvuohta Norgga álbmogis. Ruoŧa stáhta čuovvulii Norgga, muhto ii oaidnán dárbbu addit eret válddi sámi áššiid badjel, Sámediggi galggai leat ráđđeaddi jus stáhta dárbbašii ráđiid sámi kultuvrra áššiid birra.

Stáhta guorahallamat hábmejedje vuođu mo Sámedikkit galge organiserejuvvot ja evttohedje láhkavuođu. Sámedikkiid jienastanlogut ja jienasteaddjit addet luohttevašvuođa ja válddi Sámedikkiide. Sámedikkiin lea danne vejolašvuohta geavahit iešmearrideami go sii hábmejit jienastanloguid njuolggadusaid. Suopma lea áidna riika mii lea rihkkon dan iešmearrideami.

Sámedikkiid oktasaš oaidnu lea ahte jienasteaddji ferte dovddastit iežas sápmelažžan ja sámegielgeavaheapmi ferte leat dahje leamašan ruovttus. Dasa lassin leat juohke Sámedikkis iežaset gáibádusat.  

Suoma Sámedikki jienastanlohku váldá vuolggasaji dan sámi álbmotguorahallamis mii čađahuvvui 1960-logu álggus. Álbmotguorahallan geavahuvvui dego listun mii attii njuolgatvuođa rávesolbmuide jienastit áirasiid, ja leat áirrasin, Suoma stáhta sámeráđđeaddinlávdegoddái, ovdal go Sámediggi ásahuvai. Go Sámediggi ásahuvvui, de jienastanlohkogeavaheami jotkojuvvui. 

Norgga Sámedikki jienastanlohku váldá vuhtii dan dáruiduhttinpolitihka man Norgga stáhta čađahii sámiid vuostá. Danne lea sámegielgáibádus ruovttus biddjon dasa ahte unnimus ovtta máttarvánhemis ferte leat leamašan sámegiella ruovttugiellan.

Ruoŧa Sámedikki jienastanlohku, gos sámegielgáibádus lea ahte unnimus ovtta áhkus dahje ádjás ferte leat leamašan sámegiella ruovttugiellan, čuovvula Ruoŧa stáhta ovddeš sámepolitihka. Jagi 1928 boazodoallolágas dušše boazosápmelaččat dovddastuvvojedje sápmelažžan, “Lapp skall vara lapp”. Ruoŧa Sámedikki oanehis giellageavahangáibádus hilgu daid sámesogaid maid stáhta dáruiduhtii go sii eai eaiggádan bohccuid. 

Buresboahtin!

Joho Niillas seminára lea Joho Niillasa dahje Nils Jernslettena gudnin. Joho Niillas lei Romssa universitehta vuosttaš sámegiela professor. Son lei maiddái servodatberošteaddji, earret eará lei son sámediggeáirras, sámi vuoigatvuođalávdegotti áirras ja biibbaljorgalanbarggu jođiheaddji. 

Semináraráiddu ulbmil lea sámegillii gaskkustit dutkamiid ja áigeguovdilis áššiid. Sihke UiT Norgga árktalaš universitehta dutkit ja earát leat buresboahtin muitalit iežaset dutkamiid birra. Váldde oktavuođa Sámi dutkamiid guovddáža fágalaš jođiheddjiin Niklas Labbain jus háliidivččet ovdanbuktit iežat dutkama muhtun Joho Niillas semináras.

 

Få utskriftsvennlig versjon ved å trykke på denne
Informasjon
     
Når:
04.02.19 kl. 11:15 - 12:00
Hvor:
Čoahkkinlatnja Guovssu TEO-H2 2.228, Sámi dutkamiid guovddáš
Studiested:
Tromsø
Målgruppe:
Ansatte, Studenter, Gjester / eksterne
Telefon:
77644566 / 91167138

Kontakt:
Niklas Labba