Visuála profiila

Duohtavuođa- ja soabahankommišuvdna galgá guorahallat vearrivuođaid maid sápmelaččat, kvenat ja Norgga-Suoma álbmot leat gillán. Dáin olbmuin leat nanu duodjeárbevierut. Logo lea viežžan inspirašuvnna bárgidanminstaris mii geavahuvvo sámi ja kvena duojis. Dát minsttar oidno sihke ulloliinniin, čuoldinminstariin, lullisámi hervenmálles, kvenabiktasa hearvvain, beasseduojis ja gođaminstariin nu go ovdamearkka dihte Porsáŋgu-fáhcas. Kommišuvnna visuála profiila lea viežžan inspirašuvnna duodjeárbevieruin sihke lulde ja davvin.

Designelemeanttat:

Bárgidanminsttar govahallá oktiičuldojuvvon oktavuođa. Minstara linjját ovddastit álbmogiid mat galget seanadit. Sii leat bárgiduvvon oktii, beroškeahttá identitehtas ja duogážis.

Logo:

Kommišuvnna logo boahtá bárgidanminstara duogábealis. Bárgidanminstara suoivvanat ja minstara lanjat govvidit vearrivuođamuitalusaid mat galget boahtit oidnosii. Ovttaskas olbmuid historjját ja historjjálaš kárten lea kommišuvnna barggu vuođđun.

Ivnnit:

Váldoivdni lea vižžojuvvon luonddus, mii lea leamaš dehálaš sápmelaččaide, kvenaide ja Norgga-Suoma álbmogii. Šaddobáidnin lea inspirašuvdnagáldu ja kommišuvnna ivnnit leat vižžojuvvon guobbaris mii guoddá latiinnanama Hapalopilus nidulans (dárogillii kanelkjuke). Dát guoppar ráhkada sáhppes ivnni go báidná ovdamearkka dihte ullu. Sáhppat lea buorádusa ivdni ja guoddá lohpádusaid das mii lea vuordimis. Ránes-vilges ivnnit leat viežžan inspirašuvnna historjjálaš govain mat leat govvejuvvon dáruiduhttináiggis.

    Poastačujuhus

  • Sannhets- og forsoningskommisjonen
  • Handelshøgskolen
  • Postboks 6050 Langnes
  • 9037 Tromsø