Hiehte- ja doarjjaságastallama

SANKS fállá hiehte- ja doarjjaságastallamijt vásádusájda tjanádum dárojduhttemij ja vierredagojda ma båhti åvddån kommisjåvnå bargo aktijvuodan. SANKS bagádallá jus la dárbbo vuoseduvvat suohkanij jali sierratjiehppevarresvuodadievnastussaj.

Duohtavuoda- ja såbadimkommisjåvnnå barggá Finnmarkssykehuset siegen SANKS baktu.

SANKS fállá sierratjiehppedievnastusájt psykiatriddjan ja galggá kommisjåvnnåj kulturtjiehppe medisijnnafágalasj rádijt vaddet sijá bargo aktijvuodan.

SANKS viehket ulmutjijt gudi viehkev dárbahi Duohtavuoda- ja såbadimkommisjåvnå bargo aktijvuodan. Dát guosská sierraláhkáj ulmutjijda gudi li subtsastam ietjasa subttsasav tjanádum dárojduhttempolitihka ja vierredagoj gáktuj. Fálaldahka la nåvkå.

2,5 virge li SANKSA:a bieles bargguj biejadum. Da niellja terapievta li Berit Frøydis Svineng Johnsen, Marit Mildrid Utsi, Anne Karin Steffensen ja Reidun Boine, aktan akta koordináhtur.

SANKS galggá nav guhkás gå vejulasj kommisjåvnåv tjuovvot sijá ásadusájn ja gæhttjat gånnå l dárbbo viehkedit.

SANKS subtsas fálaldagá birra Duohtavuoda- ja såbadimkommisjåvnå tjåhkanimij aktijvuodan.