Joho Niillas seminára: Eamiálbmot čálamáhttu ja čállindidaktihkka sámeskuvllaide: ovdamearkkat, vejolašvuođat ja hástalusat

Sámi dutkamiid guovddáš bovde guđát Joho Niillas seminárii čakčamánu 22. beaivvi dii. 11.00-12.00. Logaldalli: Hanna Outakoski, Ubmi universitehta/UiT Norgga árktalaš universitehta.

Áigi: Disttaga čakčamánu 22. b. 2020, dii. 11.00-12.00

Koronavirusa (COVID-19) njuommunáitaga geažil, de fállat dán logaldallama dušše neahta bokte! 

Lea ráhkaduvvon Adobe Connect latnja dán seminára várás, ja čujuhus lea: https://connect.uninett.no/rkrmwnrfsgbl/

Hanna Outakoski logaldallá fáttás: 

Eamiálbmot čálamáhttu ja čállindidaktihkka sámeskuvllaide: ovdamearkkat, vejolašvuođat ja hástalusat

Dát sáhkavuorru lea joatkka 2017 juovlamánus ovdanbukton sáhkavurrui mas mun muitalin easka álggahuvvon postdok-prošeavtta birra. Prošeavtta ulbmilin lei dutkat čállinoahpahusa diskurssaid ja geavadiid skuvllas ja allaoahpuin. Prošeavtta doaimmalaš gieddedutkanáigodat lea dál juo nohkan ja lea áigi álgit guorahallat prošeavtta bohtosiid. Dán sáhkavuorus mun gieđahalan ja guorahalan čálamáhtu ja sámi čállindidaktihka vejolašvuođaid ja hástalusaid muhtin konkrehta ovdamearkkaid vehkiin. Ruoŧa Dutkanráđđi, Vetenskapsrådet (VR), ruhtadii dán postdok-prošeavtta ovttas Ubmi universitehta Oahpaheaddjiallaskuvllain. Prošeavtta doaimmalaš áigodat álggii čakčat 2017 ja nogai miessemánus 2020. Romssa universitehta lea okta prošeavtta verddeuniversitehtain.

Filosofiija doavttir Hanna-Máret Outakoski bargá sámegiela oahpaheaddjin ja vuosttašamanueansan Gielladutkamiid ossodagas Ubmi universitehtas Ruoŧas ja 2019 borgemánu rájes maiddái seammasullasaš virggis Romssa universitehtas. Son dutká čállima oahpahusa ja čállima diskurssaid sihke skuvllas ja universitehtas. Son lea maid dutkan sámegielat ohppiid čállinproseassaid ja čállima skuvlabirrasa, sámegiela gielalaš struktuvrraid, ja su stuorra beroštupmi lea virtuála oahpahus ja 3D-birrasiid geavahus unnitlogugielaid oahpahusas. Oktavuohta hanna.outakoski@umu.se dahje hanna.m.outakoski@uit.no


Dát lea guđát (ja maŋimuš) logaldallan Joho Niillas 2020 semináraráiddus.

Searvva logaldallamii: https://connect.uninett.no/rkrmwnrfsgbl/

Når: 22.09.20 kl 11.00–12.00
Hvor: Adobe Connect
Sted: Digitalt
Målgruppe: Ansatte, Studenter, Gjester / eksterne, Inviterte
Kontakt: Arnstein Johnskareng
E-post: arnstein.johnskareng@uit.no
Legg i kalender