Christian fekk foredra i Washington
Kva kan du gjera med ein simulator for det elektriske utstyret du har i bustadhus? Christian Andreas Bjerknes Nilsen fikk i haust presentera ein artikkel basert på masteroppgåva si i Elektroteknikk under den vitskapelege konferansen IECON 2018 i Washington DC.
Tidlegare masterstudent Christian Andreas Bjerknes Nilsen presenterte i haust ein artikkel basert på masteroppgåva si ved den vitskaplege konferansen IECON 2018 (The 44th Annual conference of the IEEE Industrial Electronics Society), som denne gong vart arrangert i Washington DC, USA.
Simulerar effektbruken
Christian fullførde mastergraden sin i Elektroteknikk sommaren 2018 ved IVT-fakultetet ved UiT i Narvik. Masteroppgåva hans omhandla ein simulator for elektrisk utstyr i bustadhus. Med ein slik simulator kan ein plukka ut alt det elektriske utstyret ein har i eit hus (10 LED downlight, 1 komfyr, 1 varmtvannsbereder, osv.) for så å simulera den effekten utstyret trekker. Det kan f.eks. brukast til å sjekka om det er mulig å installera ladestasjon for elbil utan at hovudsikringa går. Dersom det i framtida blir effektbaserte tariffar, blir straumrekninga større etter meir utstyr ein brukar samtidig. Då kan ein bruka ei slik simulering til å planlegga smart styring og oppnå redusert straumrekning.
Saman med rettleiar Bjarte Hoff, førsteamanuensis ved UiT i Narvik, deltok Christian på konferansen der presentasjonen hans vart godt motteken av forskingsmiljøet.
Utover eige arbeid, gav dei ulike presentasjonane eit godt innblikk i forskingsfronten innanfor kraftelektronikk og omformarteknologi. Bjarte presenterte òg ein artikkel basert på forsking innan modellprediktiv regulering.
Presentasjon gjev kontaktar
Ved å presentera dette på ein vitskapskonferanse som IECON, viser ein fram arbeidet til andre forskarar som kan ha nytte av det. Det kan også føre til at ein kjem i kontakt med personar som jobbar med tilsvarande problemstillingar som ein kan samarbeida med i framtida, samt at artikkelen blir tilgjengelig i ein database på internett. Reint personleg er det ein fordel å publisera om ein ynskjer å studere vidare til å bli forskar, sidan dette kan bli brukt i samband med jobbsøknad.
Konferansen i Washington DC gjekk over tre dagar og vart arrangert på det ærverdige «Omni Shoreham Hotel», som blant anna har husa innviingsball for mange amerikanske presidentar. Utover konferansen har byen mykje å by på i form av kjente stadar, monument, museum og andre attraksjonar, og tida før og etter konferansen vart nytta til å sjå så mykje av byen som mogeleg.
Reisa vart gjennomført ved hjelp av prosjektet «Arctic Energy», som er finansiert gjennom EU-programmet Interreg Nord, og dessutan Nordland og Troms fylkeskommune.