Chomsky til Tromsø i september
Den verdskjende språkforskaren, filosofen og politiske aktivisten Noam Chomsky kjem til Universitetet i Tromsø i september. Chomsky blir ofte inkludert i topp-ti-lista over verdas mest innflytelsesrike intellektuelle.
 |
| Noam Chomsky kjem til Tromsø i september. Foto: Wikipedia. |
Høvet er at CASTL (Center for Advanced Study in Theoretical Linguistics) markerer sine ti år som senter for framifrå forsking. Det skjer med konferansen Decennium: The First Ten Years of CASTL, der Chomsky skal halde innleiingsføredraget.
- Me gler oss sjølvsagt stort, seier Marit Westergaard, direktør ved CASTL.
- Chomsky har vore og er til stor inspirasjon for forskarane ved CASTL, særleg dei som driv med syntaks, seier Westergaard.
Intellektuell verdskjendis
Noam Chomsky er ei akademisk superstjerne. Det finst kåringar av mange slag, men dei fleste som prøver å namngje verdas mest innflytelsesrike intellektuelle vil inkludere Chomsky på topp-ti-lista.
Han har arbeidd ved det prestisjetunge Massachusetts Institute of Technology (MIT) sidan 1955 og har kome med epokegjerande bidrag til den moderne språkvitskapen med sine teoriar om universell grammatikk. Han er filosof og forfattar, og ein svært produktiv og radikal samfunnskritikar som gjev seg til kjenne på den internasjonale arenaen.
- I tillegg til det språkvitskaplege føredraget skal han også halde ei politisk innleiing. Ho er sjølvsagt open for alle, seier Westergaard.
Chomsky er i sitt 83. år, men reiser framleis verda rundt. I fjor var han i Oslo, og det seier noko om lingvistikkmiljøet i Tromsø at det ikkje er første gong Chomsky vitjar denne byen - han var her også på "Comparative Germanic Syntax Workshop" i november 1992.
CASTL lever vidare
.jpg "MaritW (305x640).jpg") |
| Direktør ved CASTL, Marit Westergaard. Her ved lanseringa av siste nummer av OTTAR. Foto: Sigrun Høgetveit Berg. |
Decennium-konferansen skal markere at CASTL som senter for framifrå forsking (SFF) er over. Det var eitt av dei 13 første SFFa som Noregs Forskingsråd oppnemde, og både med dette og andre arrangement til hausten skal status gjerast opp: Kva har senteret bidrege med, og kvar går vegen vidare?
Universitetet i Tromsø har vedteke at CASTL skal leva vidare som eige senter med eigen direktør og forskarskule, men frå nyttår organisert under Institutt for språkvitskap på HSL-fakultetet.
- Me er jo allereie vorte noko meir enn eit SFF. Me har tilknytte forskingsprosjekt som har kome til på ulikt vis, og mange av forskarane våre får midlane sine utanfor SFF-løyvinga, fortel Westergaard.
Og lovar at forskinga kjem til å halde fram med uforminska styrke.
- Som ein del av starten på vårt nye liv har me fått seks nye stipendiatstillingar, noko som gjev oss eit løft til vidare hard jobbing, forsikrar ho.
Men først skal dei feire seg sjølve - med forsking - i september.
