Logopedi-studium opna
I dag starta det nye masterstudiet i logopedi opp ved Universitetet i Tromsø. Studiet er eit samarbeid mellom HSL-fak og Helsefak. ved UiT, men studentane er å finne i Brønnøysund.
 |
| Samlingane på logopedistudiet i Brønnøysund går føre seg delvis saman med spes.ped.-studiet på campus i Breivika ved hjelp av tovegs lyd- og biletkommunikajson. – Eit spennande samarbeid, seier instituttleiar Sonni Olsen. Foto: Sigrun Høgetveit Berg |
Masterstudiet i logopedi er eit profesjonsstudium med språkvitskapleg og psykologisk tilnærming. Studentgruppa på logopediutdanninga er i Brønnøysund, så UiT har oppretta eit samarbeid med Torgar næringshage. Undervisninga går delvis samstundes med masterstudiet i spesialpedagogikk, og då møtest studentane på skjerm ved hjelp av tovegs lyd- og biletkommunikasjon mellom Tromsø og Brønnøysund. På første førelesinga - om førstespråkstileigining - var studentane samla slik.
– Det er spennande å få vera med på denne oppstarten av eit studium med moderne arbeidsformer og samkøyring mellom spesialpedagogikk og logopedi. Fagmiljøet blir større og kan gje fagleg inspirasjon for eksempel i val av tema for masteroppgåvene, sa instituttleiar Sonni Olsen då ho ønskte velkomen på vegner av Institutt for lærarutdanning og pedagogikk.
Universiteta i Tromsø og Nordland fyller ut kvarandre
Rektor Jarle Aarbakke er ein av fleire som har ivra for å få studiet i gang, og på opninga trekte han fram det spennande samarbeidet mellom Tromsø og Helgeland. Samstundes som UiT opnar sitt tilbod, startar det òg opp logopediutdanning ved Universitetet i Nordland.
– Det blir stadig stilt spørsmål ved om vårt studium står i eit konkurranseforhold til Universitetet i Nordland. Nei, svarar eg, det er ein perfekt komplementaritet, sa rektor, før han ønskte studentane lukke til og såg fram til å få attendemeldingar om studiet frå dei.
– Vårt motto er: "Ein treng ikkje vera dårleg for å forbetre seg."
 |
| Rektor Jarle Aarbakke ønskte dei nye studentane i Tromsø og Brønnøysund velkomne. Foto: Sigrun Høgetveit Berg |
