Skulle du gjerne vore litt flinkare i tysk?
Har du lyst til å studere tysk der tyskarane er? Eller treng du litt påfyll på skuletysken for å lesa betre internasjonal faglitteratur? Eller kanskje det er spennande fagmiljø du ønskjer å koma i kontakt med? Då kan kanskje det tysk-norske studiesenteret i Kiel hjlepe deg.
 |
| Kiel opnar seg mot Østersjøen og nord - og har lang tradisjon for kontakt med Skandinavia. Foto: Universitetet i Kiel. |
- Dette senteret har ei 25 år gamal historie og blir drive i samarbeid mellom universiteta i Tromsø, Bergen, Trondheim, Oslo, Noregs Handelshøgskole og Universitetet i Kiel. Det har som mål å gje norske studentar og forskarar eit kurstilbod innan innan tysk språk og kulturkunnskap ved Universitetet i Kiel, seier Marie-Theres Federhofer.
- Dei tilbyr språkkurs av alle slag, mellom anna fire store studiepoenggjevande kurs i tysk. Me prøver å parallellkøyre eitt av desse kursa med eit bacheloremne her, slik at det er enkelt for studentane å passe det inn i sine studieløp.
- Me synest det er positivt for heile språkopplæringa at studentane allereie på eit tidleg tidspunkt i studiet dreg til Tyskland. Tilbakemeldingane frå dei som har vore i Kiel er veldig gode - det er enkelt å reise og rammene rundt er godt etablerte, seier ho.
Også for forskarar
Federhofer er professor i tysk litteratur og leiar i det norske heimestyret for det tysk-norske studiesenteret i Kiel, DNSZ. Håkon Fottland er sekretær.
- Senteret har også gjensidig vitskapleg og kulturell utveksling mellom Tyskland og Noreg som mål, seier han.
- Særleg ønskjer me difor å syne at også forskarar kan ha nytte av dei tilretteleggjande tenestene som senteret tilbyr. Til dømes har forskarar ved UiT samarbeid med forskingsmiljø innan marin, helse og biologi i Kiel, utan at senteret har vore involvert i dette. Kanskje kunne dette samarbeidet vorte endå betre med den praktiske hjelpa senteret kan bidra med, seier Fottland.
 |
| Takterrassen på Det norske instituttet i Roma - til inspirasjon både for forskar og student. Foto: Sigrun Høgetveit Berg |
Mange senter og institutt
Universitetet har mange slike avtaler med senter og institutt rundt om i Europa. Nokre msom primæørt driv emd språkoplæring, andre med større vekt på forsking og/eller undervisning innanfor fleire fag. Felles for dei fleste er at dei ikkje blir rende ned av forskarar og studentar frå Tromsø - difor prøver univesitetet no å markandsføre dei betre.
- Det er mange måtar å bruke desse miljøa på, men dei er ikkje så godt kjende. Dei ulike sentra og institutta tilbyr ulike ting, så det har ikkje vore like lett å orientere seg for brukarane, seier Fottland.
- Dei fleste tilbyr emne innanfor språk og kultur som kan passast inn i ein grad, nokre også førebuande språkemne - det kan vera relevant for alle som ikkje studerer eller forskar på språk, men som treng kunnskap i til dømes tysk eller fransk i arbeidet sitt. Difor skulle desse sentra også vera interessante for studentar og forskarar på andre fakultet enn HSL, meiner han.
- Først gjer me no ein innsats for å samle informasjon og synleggjera denne, gjennom ei felles nettside. Her kan du finne opplysningar om kva sentra tilbyr, kontaktinformasjon og lenker, slik at det vonaleg blir lettare å orientere seg, seier Fottland.
- Aktiv bruk av ulike språk både innan og utanom fagkretsen blir stadig viktigare i arbeidsmarknaden, og ikkje berre engelsk som vi får inn på TV-kanalane. Sentra kan gjera det lettare for fleire å få god språkkompetanse på CVen, avsluttar han.
