1700-talskapasitetar til Tromsø i oktober
Når Norsk selskap for 1700-tallsstudier inviterer til konferanse i Tromsø i 27.-30. oktober, får ph.d.-studentar høve til å bli lesne av internasjonale kapasitetar.
Hovudtemaet for konferansen er «Persistenser: Syttenhundretallet som arvtaker», og selskapet har sikra seg historikaren Stéphane van Damme frå Paris og dirigenten Andrew Parrott frå Oxford som keynote speakers.
 |
|
Stéphane van Damme arbeider ved Sciences Po i Paris. Sidan han disputerte i 2000 har han publisert ei rekkje bøker og artiklar om 1600- og 1700-talet, også på nordiske språk. Tittelen på føredraget hans er "The Enlightenment Predicament: Exploring the Pathologies of the Public Sphere".
|
Andrew Parrott |
Andrew Parrott er invitert til Tromsø i samarbeid med Tromsø Internasjonale Kirkefestival. Parrott er kjent for sine banebrytande rekonstruksjonar av den samtidige oppføringspraksisen for verk av 1600- og 1700-talskomponistar som Monteverdi, Purcell og Bach. Under føredraget sitt vil Parrott demonstrere desse rekonstruksjonane i praksis. Dette vil gå føre seg i Tromsø Domkirke, med tittelen "Johann Sebastian Bach: Child of the Seventeenth Century".
Paper-sesjon for ph.d-studentar
Norsk selskap for 1700-talsstudier er eit nettverk for forskarar, studentar og andre som arbeider profesjonelt med 1700-talet som kunnskapsområde. Selskapet er tverrfagleg og ønskjer å fremja interessa for 1700-talsforsking i Noreg. I framkant av konferansen, torsdag 27. oktober, blir det høve for ph.d.-studentar å leggje fram tekstar som Parrott og van Damme, saman med ein styremedlem frå 1700-talsselskapet, kommenterer. Deltaking i denne paper-sesjonen gjev studiepoeng i opplæringsdelen av doktorgradsarbeidet.
- Selskapet har i dei siste par åra opplevd ein markant vekst og tel no over 100 medlemmer. Me er mellom anna involvert i utgjevinga av den nordiske årboka for søttenhundretalsstudium, Sjuttonhundratal. Denne inneheld vitskaplege artiklar og bokmeldingar innan alle fag, skrive av nordiske forskarar. Men konferansane er utan tvil vårt viktigaste faglege forum. Med papersesjonen håpar me å gi doktorgradsstipendiatar eit ekstra insentiv til å koma, seier Per Pippin Aspaas, sekretær i selskapet.
Konferansen blir avslutta med konsert
Konferansen i Tromsø blir avslutta med ein konsert i Tromsø Domkirke, der Andrew Parrott vil vera dirigent. Hovudverket blir kantate BWV 106 Gottes Zeit ist die allerbeste Zeit (Actus Tragicus), med mellom andre Berit Solset, Anne-Carolyn Schlüter, Magnus Staveland, Håvard Stensvold, Vokal Nord og Lux Borea.
Påmeldingsskjema for konferansen finn du her (frist 15. juni).
Påmeldingsskjema for paper-sesjonen finn du her (frist 1. september).
