Det juridiske fakultet

Ved Universitetet i Tromsø er det ledig ei stipendiatstilling i rettsvitskap for søkarar som ønskjer å ta
graden ph.d. med prosjekt innanfor energirett.

Tilsettinga gjeld for fire år.

Stipendiatstillinga er knytt til prosjektet ”Energirett i nordområdene”, som er delfinansiert av RDA Tromsø
ved Troms Fylkeskommune. Prosjektets overordna målsetting er å bygge ut nordområderett gjennom
etablering av energirett som ei særskilt fageining, og vil få fagleg forankring innafor forskingsverksemda
innafor hav- og miljørett ved fakultetet.

Tema for avhandlinga er energirett. Klimaendringar som fører til smelting av havisen og klarlegging av
maritime grenser i nordlege havområde aukar tilgangen til petroleumsressursar. Det sårbare miljøet er ei
særleg utfordring ved industriutviklinga i dei nordlege havområda. Eit sentralt forskingstema er derfor
rettslege problemstillingar knytte til betydinga av klimaendringar i nordområda, medrekna i kva slags grad
regelverket for petroleumsverksemd eller anna energiutvinning er tilpassa det sårbare miljøet og dei
klimaendringane vi står overfor. Også andre tema innafor energirett kan vere aktuelle, og avhandlinga kan
omfatte både privatrettslege-, offentlegrettslege- og folkerettslege problemstillingar.